Тойдемар но Юсь-ныл (пор калык выжыкыл)

Мар понна сюранай Тойдемарез яратымтэ, инмарлы но, перилы но тодмо ӧй вал, пе. Лек
кышномурт сюрпизэ уй но нунал секыт ужъёсты быдэсъятэм… Огпол Тойдемар сезьы бусызэс эскерыны малпам. Ана кузя мыныкуз, паймымон пытьыос-
ты адӟем. Соос кузя вамыштэм. Зарезь дуре вуэм. Пытьыос вылэ выос (ловушка) пуктылэм но юсез кутэм. Та чебер бурдолэн пыдысьтыз шапыкен вир, пе, вия. Юсез дораз ваем но солэсь пыдзэ шырбыжен бинем.Тойдемар огдырлы коркась потоно луэм. Со вакыт сюранай юсез кутэм, гонзэ ишкем но тылыоссэ ӝуась гуре куштэм. Куректэ ни, пе, Тойдемар. Озьы кайгырыкуз
одӥгез синкылиез юсь вылэ усем. Йӧно тылобурдо син куспын кузь пунэтэн чебер ныллы пӧрмем. Тойдемар сое китӥз кутэм но тазьы, пе, вазиськем:
— Эн тышкаське, анай, вордэм атай. Кузпалъялэ милемыз.Сюранай кылзэ ньылэм мурт кадь луэм. Нош атайзы бакель карем егитъёслы, бур улон сӥзем.Тойдемар, пе, со дырысен котькуд югыт нуналлы шумпотыса улыны ӧдъям. Сюранаезлэн ултӥямез но чебер, мусо кузпалзэ яратыны ӧвӧл ни люкетылэм.Нош Юсь-ныллэн мылкыдыз секыт улэм. Сюранай кензэ яратымтэ. Вазь ӵукнаысен бер ӝытозь ужатыса возем. Но егит нылэз уж, пе, зӥбымтэ, ултӥян ӝожомытылэм. Огпол со чидамтэ ни. Тойдемарезлы тазьы, пе, вазем:
— Мусое, та дуннеын улыны секыт. Ойдо мынам вынъёсы-тӧдьы юсьёс доры лобӟом.
— Адями — бурдо ӧвол… — секыт но мур лулӟем пумитаз Тойдемар.
Огпол сӥзьыл ӵукна сюранай кензэ ошмес вулы ыстэм. Юсь-ныл вуэм ошмес дуре но ӝожмыт
кырӟанзэ мытэм. Сое кылыса, тӧдьы юсьёс вуиллям но быдэн тылызэс куштыса кельтӥллям.
Нылаш соосты бичам но кыз улэ ватэм. Мукетаз ӵукна Юсь-ныл нош ик ошмес дуре
мынэм. Сюранай, пе, шумпотэ ни кенэзлэн коркась кошкылэмезлы. Нош Тойдемар мар ке но умойтэмзэ шӧдэм. Куинетӥ ӵукнаяз но Юсь-ныл ошмес дуре мынэм. Таяз учыре со яратоно кузпалыныз уката ӝожмыт люкиськем.Тойдемар кышноезлэсь секыт мылкыдзэ валам. Сьӧраз мынэм. Ошмес дуре вуэм но адњем: солэн мусо Юсь-нылыз тылыосты бичаса, выльысь
тӧдьы юсьлы пӧрмытскем. Тойдемар сое кутыны-дугдытыны вырем но, бере кылем. Мусокаез инбаме ӝутскем. Тойдемар нош ик мур кайгуэ усем. Секыт мылкыдын зар-зар бӧрдыны кутскем.
Егит пилэсь сыӵе кайгыремзэ юсьёс кылӥллям. Тылыоссэс быдэн одӥген ишкалтӥллям но
 Тойдемар тӧдьы юсьлы пӧрмем. Со дырысен, пе, та кык тӧдьы юсьёс ог-огзылэсь люкиськылӥллямтэ ни.